| ڊاڪٽر انيس فاطمه سومرو | شاهه عبداللطيف جي ڪلام ۾ موجود درس |
| جي ايم سيد | پيغامِ لطيف |
| عبدالواحد آريسر | وريا واهرو |
| رنڌير سنگھه | ڏونگر نيٺ ڏُرن |
| استاد بخاري | هي گجرا هي گولا |
| استاد بخاري | بخاريءَ جا قطعا |
| راشد مورائي | دل جو شهر |
Sindhi Poetry Books download.
وحيد گُل ميمڻ
ڪراچيءَ جو بندر روڊ جتي ڪجهه وقت اڳ جڏهن ايم ڪيو ايم يا جماعت اسلامي طرفان ڪا ريلي ڪڍي ويندي هئي ته ان کي ملين مارچ جو نالو ڏنو ويندو هو پر 2009ع ۾ جيئي سنڌ قومي محاذ طرفان جڏهن ساڳئي روڊ تي ريلي ڪڍي وئي ته ان ۾ سنڌ جي ڪنڊ ڪڙڇ مان سنڌي ٽوپيون ۽ اجرڪ اوڍي هزارين ماڻهن شرڪت ڪئي ۽ مبصرن جو خيال هو ته ريليءَ ۾ 50 هزار کان وڌيڪ ماڻهن شرڪت ڪئي، پر تنهن باوجود به پاڻ کي قومي ميڊيا سڏرائيندڙ اخبارن انهي ريلي کي اها ڪوريج نه ڏني جيڪا ڏيڻ گهرجي ها، بهرحال وري ساڳئي روڊ تي عوامي تحريڪطرفان ريلي ڪڍي وئي جنهن ۾ به سنڌ جي ڪنڊ ڪڙڇ مان هزارين ماڻهن شرڪت ڪئي ۽ هاڻي وري سنڌ ترقي پسند پارٽيءَ طرفان “ڪراچي سنڌ آهي” جي نالي سان ريلي ڪڍي وئي جنهن ۾ به ڪراچي جي ٻهراڙين سميت ڪنڊ ڪڙڇ مان هزارين ماڻهن سنڌي ٽوپيون ۽ اجرڪ اوڍي شرڪت ڪئي، انهيءَ ريلي دوران بندر روڊ “سنڌ سنڌين جي آهي” ۽ “سنڌ جا وارث سنڌي ئي آهن” جا نعرا گونجي رهيا هئا ۽ سنڌ جي مالڪي جي دعويداري ڪندڙن لاءِ اهو کُليل پيغام آهي ته هو ڪنهن غلط فهميءَ جو ئي شڪار آهن ۽ سنڌ جا اصل وارث پنهنجي ڌرتيءَ جي مالڪي واري ذميواري کان ڪنهن به ريت غافل نه ٿي سگهندا.
جسقم جي ڪراچي ۾ ڪڍيل ريليءَ جي ڪجهه ڏينهن کانپوءِ هڪ صحافي دوست ڪچهريءَ دوران ٻڌايو هو ته ڪراچيءَ ۾ سندس دوست جيڪو ڪراچيءَ ۾ هڪ اخبار جو رپورٽر آهي، ان کي مالڪن ۽ ايڊيٽر طرفان جسقم جي ريلي واري خبر بابت هدايت ڏني وئي ته هو ان ريلي جي 150 اکرن کان وڌيڪ خبر نه ڏئي جنهن تي هُن احتجاج ڪندي موقف اختيار ڪيو ته ايڏي وڏي ريليءَ جي خبر150 اکرن ۾ ڪيئن ٿي پوري ٿي سگهي ۽ اهڙي صورت ۾ هو اها خبر نه ٿو ڏئي سگهي، جنهن تي کيس پهرين 50 اکر ۽ وري ٻيهر 50 اکر وڌي مليا ۽ آخر ۾ کيس اڍائي سئو اکرن تي مشتمل خبر ڏيڻ لاءِ چيو ويو. انهيءَ دوست جي انهي ڳالهه تي ڪنهن حد تائين حيرت ته ٿي پر قومي ميڊيا سڏرائيندڙن لاءِ بهرحال هڪ تصور به منهنجي ذهن ۾ ضرور جنم ورتو. اهو اتفاق آهي يا ڪنهن جي طرف کان خاص هدايتون ڏنيون وڃن ٿيون جو هڪڙن جي ريلين کي ته ملين مارچ جو نالو ڏنو وڃي ٿو ۽ ٻين جي خبر لاءِ ماپا مقرر ڪيا وڃن ٿا.
سنڌ تي راتاهن جي تاريخ ته پراڻيآهي، هلاڪو کان چنگيز ۽ چارلس نيپئر تائين جي قصن سان تاريخ ڀريل آهي پر اصل وارثن جي موجودگي ۾ ڪراچيءَ تي مالڪي جون دعوائون ويجهي ماضي جي هڪ اهڙي ڪهاڻي آهن جنهن کي شايد حقيقت جو روپ ڪڏهن به حاصل نه ٿي سگهي پر سازشي عنصرن کي اهو جواب ئي ڪافي آهي ته سنڌ جو ماڻهو معاشي بدحاليءَ سميت ڪيترن ئي مسئلن جو شڪار ڇو نه هجي پر اهو ڪڏهن به پنهنجن شهرن ۽ وسيلن جي مالڪي واري ويڙهه تان هٿ ڪنهن به صورت ۾ نه کڻندو.
حيرت جي ڳالهه اها آهي ته ڪجهه ڏينهن اڳ اي اين پي سنڌ جي صدر شاهي سيد به ڪراچي پختونن جو شهر هجڻ جي ڳالهه ڪئي. اردو ڳالهائيندڙ ته ڪراچيءَ تي مالڪيءَ جون دعوائون ڪندا رهيا آهن ۽ کانئن شايد اهو وسري ويو آهي ته کين اسان جي وڏن پاڻ وٽ پناهه ۽ پنهنجين ملڪيتن تي مالڪيءَ جو حق ڏئي اهڙو ٿورو ڪيو جنهن کي هو ته سڄي عمر نه لاهي سگهندا پر سندن اولاد به اهي ٿورا لاهي نه ٿو سگهي. اردو ڳالهائيندڙن جون اهي دعوائون ٻڌائين ٿيون ته هو شايد هتان جي اصل رهواسين جا اهي ٿورا وساري چڪا آهن ۽ هو مالڪن جي موجودگيءَ ۾ سندن گهر تي مالڪيءَ جي دعويٰ ڪري رهيا آهن. پشاور کي ته پختونن جو شهر چئي سگهجي ٿو پر ڪراچيءَ کي ڪهڙي بنياد تي پختونن جو شهر چيو وڃي اها ڳالهه سمجهه کان ٻاهر آهي!. اها ڳالهه مڃي به وٺجي ته ڪراچيءَ ۾ سنڌي ڳالهائيندڙن جو انگ گهٽ آهي پر ان جو اهو مطلب هرگز ناهي ته ڪو ڌارين جي لوڌ کي هو پنهنجي شهرن تي مالڪيءَ جون دعوائون ڪرڻ جي اجازت ڏيندا. سنڌي ۾ چوندا آهن “آئي ڏنڊو کڻڻ ۽ بڻجي وئي بورچياڻي” سو شاهي سيد کي اهو وسارڻ نه گهرجي ته هو جيڪڏهن اڄ ڪراچيءَ ۾ آباد به آهن ته اهي صرف ڪمائڻ خاطر هتي آيا آهن ۽ ڪراچي سنڌين جو شهر آهي، هو ۽ هميشه رهندو.
ڪراچيءَ جي مالڪيءَ جي دعويدارن کي هاڻي ته اکيون کولڻ گهرجن ته ڪراچي ئي اصل ۾ سنڌ آهي ۽ سنڌ جي ڪهڙي به ڪنڊ ۾ رهندڙ هر ماڻهو جو ڪراچيءَ سان به اوترو ئي چاهه آهي جيترو هو پنهنجي ننڍپڻ وارا ڏينهن گذارڻ واري ڳوٺ سان رکي ٿو. ان ڪري کين اهڙيون دعوائون نه ڪرڻ گهرجن جن سان سنڌ جي اصل وارثن جا زخم وري تازا ٿين ۽ وري ڪا اهڙي لهر اڀري جو واري جي اڏيل سمورين ديوارن کي ڀڃي ڀورا ڪرڻ لاءِ ڪافي هجي.
E-mail: waheedgul07@yahoo.com
سنڌ، تعليم ۽ تعليمي ادارا ... لياقت عزيز
ڪنهن به قوم جي ذهني اوسر ۽ قومي ترقيءَ ۾ تعليم جو ڪردار اهم هوندو آهي. تعليمي ادارا قومن جي اسرڻ ۽ نسرڻ ۾ بنيادي اهميت رکن ٿا. تعليمي ادارن ۾ روشني جنم وٺي ٿي، تعليمي ادارا ڪنهن به قوم جو قومي مورچو هوندا آهن. تعليمي ادارن ۾ انقلاب پلجن ٿا. دنيا جي تواريخ جو اڀياس ڪبو ته اسان کي اهو معلوم ٿيندو ته هر قوم ۾ ڪو نه ڪو مقدس تعليمي ادارو ضرور ملندو، جيڪو قومي آزادي ۽ انقلاب لاءِ روشني جو مينار ثابت ٿيو آهي. جيڪڏهن ”آمريڪن يونيورسٽي بيروت“ نه هجي ته عربن ۾ ڪڏهن به قومپرستي جي لهر نه اڀري ها، بنگلاديش ۾ ڍاڪا يونيوسٽي نه هجي ها ته بنگالي پنهنجي ماڳ تي نه پهچن ها، تهران يونيورسٽي نه هجي ها، ته شايد ايران مان شهنشاهيت جو خاتمو نه اچي ها ۽ جيڪڏهن سنڌ يونيورسٽي نه هجي ها ته سنڌين جي جان ون يونٽ مان نه ڇٽي ها ۽ سنڌ ۾ قومپرستيءَ جو جذبو پيدا نه ٿئي ها. سنڌ ۾ ڪيتريون ئي يونيورسٽيون آهن، ڪاليج آهن، هاءِ اسڪول ۽ پرائمري اسڪول آهن، پر جيڪڏهن اسان ايمانداري ۽ غير جانبدارانه نموني انهن جي ڪارڪردگي جو جائزو وٺنداسين ته، خبر پوندي ته سنڌ جا سڀ تعليمي ادارا اهو ڪردار ادا نه ڪري رهيا آهن، جيڪو ڪنهن به قوم کي مهذب ۽ ترقي يافته بنائڻ لاءِ ضروري هوندو آهي. شاگردن جي گروهه بندي ۽ اناپرستيءَ جي ڪري يونيورسٽيون مقتل گاهه بنيل آهن، يونيورسٽين ۾ هر ٻئي ٽئي ڏينهن شاگردن طرفان ڪنهن نه ڪنهن ڳالهه تان ڪلاسن جو بائيڪاٽ ڪيو وڃي ٿو. جيڪي شاگرد ۽ شاگردياڻيون تعليم حاصل ڪرڻ چاهين ٿا، انهن کي زبردستي تعليم حاصل ڪرڻ کان روڪيو وڃي ٿو. سنڌ جي يونيورسٽين جي اها صورتحال سنڌ جو تعليمي ماحول تباهه ڪري ڇڏيندي، ان جو نتيجو اهو نڪرندو ته مائٽ پنهنجا ٻار يونيورسٽين ۾ موڪلڻ بند ڪري ڇڏيندا. سرندي ورا ته پرائيويٽ يونيورسٽين ۾ وڃي تعليم حاصل ڪندا، پر مڊل ڪلاس، لوئر مڊل ڪلاس ۽ محنت ڪش طبقي جي ٻارن تي تعليم جا دروازا هميشه بند ٿي ويندا. سنڌ جي سڀني سياسي پارٽين ۽ خاص طور تي حڪومت سنڌ کي هن اهم مسئلي تي توجهه ڏيئي سنڌ جي يونيورسٽين مان بدامني کي تڙڻ لاءِ پنهنجو قومي ڪردار ادا ڪرڻ گهرجي. سنڌ جي پبلڪ سيڪٽر ۾ قائم ٿيل ڪاليجن جي حالت به ڪا قابل رشڪ ناهي. ماضيءَ ۾ جيڪي عوام دشمن ۽ آمريت جي ڪک مان پيدا ٿيل حڪومتون هيون، انهن ته ڄاڻي واڻي سنڌ جي ڪاليجن کي نظرانداز ڪيو، ان جي نتيجي ۾ ٻهراڙي جا بوائز توڙي گرلز ڪاليج مڪمل طور تي تباهه ٿي ويا. گذريل ٻن سالن کان سنڌ اندر عوامي حڪومت آهي، پر عوامي حڪومت به هنن ڪاليجن جي بهتري لاءِ ڪي مثبت قدم نه کنيا آهن. اڳوڻو سيڪريٽري تعليم ته پنهنجي آفيس تائين محدود رهيو. هن ٻن سالن جي عرصي دوران ڪنهن به تعليمي اداري جي صورتحال جو جائزو نه ورتو. هاڻ نئون سيڪريٽري تعليم آيو آهي، گهٽ ۾ گهٽ هفتي ۾ ٻه ڏينهن ٻهراڙي جي ڪاليجن ۾ وڃي پاڻ ڏسي ته انهن جون ضرورتون ڪهڙيون آهن؟ هي دور ميرٽ جو دور آهي. يونيورسٽين يا پروفيشنل تعليمي ادارن ۾ جيڪو داخلا جو سسٽم رائج آهي. اهو انٽري ٽيسٽ جي ذريعي آهي. جيڪڏهن ٻارن وٽ سائنس جا استاد نه هوندا ته صحيح معنيٰ ۾ ڪيئن تعليم حاصل ڪري سگهندا؟ انٽري ٽيسٽ جو امتحان ڪيئن پاس ڪري سگهندا!؟ ساڳي صورتحال هاير سيڪنڊري اسڪولن، هاءِ اسڪولن ۽ پرائمري اسڪولن جي آهي. ٻه سال گذري ويا، پر هنن تعليمي ادارن جي صورتحال به نه سڌري آهي. جڏهن اسان پنجاب جي تعليمي صورتحال جو جائزو وٺنداسين ته اتي ٻن سالن ۾ تعليمي ادارن جي صورتحال ۾ بهتري آئي آهي. سنڌ جي تعليم کاتي جي ڪرتا ڌرتائن کي به سنڌ جي تعليمي ادارن جي مالڪي ڪرڻ کپي. اڄڪلهه صورتحال اها آهي ته هر هنڌ پرائيوٽ تعليمي ادارا برساتي کنڀين جيان گهر گهر، گهٽي گهٽي کلي رهيا آهن، جتي تعليم مهانگي آهي. غريب طبقي جا ماڻهو، جيڪي ٽن وقتن جي مانيءَ لاءِ ڏينهن رات جاکوڙ ڪن ٿا، اهي پرائيوٽ تعليمي ادارن ۾ پنهنجي ٻارن کي تعليم ڏيڻ جو سوچي به نٿا سگهن. ڪراچي ۾ به سنڌ جي ٻهراڙين جي ٻارن لاءِ تعليم حاصل ڪرڻ لاءِ دروازا بند آهن، گلگت بلتستان، ڪشمير، فاٽا جي ٻارن لاءِ ته سيٽون مخصوص آهن، پر سنڌ جي ٻهراڙيءَ جو ٻار ڪراچيءَ جي تعليمي ادارن ۾ تعليم جو سوچي به نٿو سگهي! ڪاليج سطح تي پبلڪ سيڪٽر ۾ ڪاليجن منجهه جيڪا تعليم ڏني وڃي ٿي، انهن ۾ پري ميڊيڪل، پري انجنيئرنگ، ڪامرس ۽ آرٽس جون فيڪلٽيون شامل آهن، جيئن ته دنيا جديد علوم جي ميدان ۾ ترقي ڪري رهي آهي ته سنڌ سرڪار جو اهو به قومي فرض بنجي ٿو ته جيڪي فيڪلٽيون آهن، انهن جي حالت بهتر بنائي وڃي ۽ ڪاليجن ۾ جديد علوم جا شعبا پڻ کوليا وڃن ته سنڌ جا ٻار دنيا سان ميرٽ جي ميدان ۾ مقابلو ڪري سگهن. هن وقت سنڌ صوبي ۾ هوم اڪنامڪس جي شعبي ۾ هڪ پوسٽ گريجوئيٽ ڪاليج آهي، جيڪو صرف ڪراچي ۾ آهي، جيئن ته هوم اڪنامڪس جو شعبو جديد علوم جو هڪ حصو آهي. صوبي جي مختلف ڪاليجن ۾ گريجوئيٽ سطح جي تعليم نياڻين کي ڏني وڃي ٿي، پوسٽ گريجوئيٽ هوم اڪنامڪس ڪاليج ڪراچي ۾ هئڻ ڪري، سنڌ جون نياڻيون ڪراچي ۾ ويندي گهٻرائين ٿيون، ڇاڪاڻ ته ڪراچي بارود جو ڍير هئڻ ڪري بدامني جي آماجگاهه بنيل آهي. 1988ع ۾ شهيد بينظير ڀٽو جي پهرئين دور حڪومت ۾ ڪراچي کان ٻاهر هوم اڪنامڪس جي شعبي ۾ هڪ پوسٽ گريجوئيٽ ڪاليج قاسم آباد ۾ منظور ٿيو ته جيئن ٻهراڙي جون نياڻيون پوسٽ گريجوئيٽ جي تعليم حاصل ڪري، زندگي ۾ باعزت مقام ماڻي سگهن. بلڊنگ تيار ٿي ويئي، پر 1990ع ۾ لساني فسادن جي ڪري ان بلڊنگ ۾ ڪاليج نه کلي سگهيو. ارباب دور ۾ ان وقت جي وزير تعليم جي هدايت تي هن بلڊنگ ۾ پوليس اسٽيشن قائم ڪرڻ جو ارادو ڪيو ويو، پر قاسم آباد جي باشعور ماڻهن جي احتجاج سبب پوليس ٿاڻو نه کلي سگهيو، بعد ۾ سياسي رشوت عيوض هي بلڊنگ هڪ پرائيوٽ اسڪول کي ڏني ويئي. تازو ٻيهر هن بلڊنگ جي هڪ حصي تي قبضو ڪري ٿاڻو کولڻ جو فيصلو ڪيو ويو، جيڪو قاسم آباد جي رهواسين جي احتجاج ڪري ختم ڪيو ويو. هي تعليمي ادارو سنڌ حڪومت جي ملڪيت آهي، عوام جي پگهر ۽ پورهئي تي لڳايل ٽيڪس جي آمدني مان جڙيو آهي، جيڪڏهن هن بلڊنگ ۾ نياڻين لاءِ هڪ نئون گرلز ڪاليج کوليو وڃي ۽ ان ۾ جيڪي فيڪلٽيون قائم ڪرڻ گهرجن، انهن ۾ ايم اي هوم اڪانامڪس، ايم ڪام، ايم سي ايس انفارميشن ٽيڪنالاجي، ڪمپيوٽر سائنس، پبلڪ ايڊمنسٽريشن، بي بي اي ۽ ايم بي اي شامل هئڻ گهرجن ته سنڌ جي هزارين نياڻين کي تعليم جهڙي اهم زيور سان آراسته ڪري سگهجي ٿو. جيڪڏهن هي بلڊنگ سنڌ سرڪار پنهنجي قبضي ۾ وٺي، نياڻين لاءِ گرلز ڪاليج نه کوليو ته اها سنڌ جي عوام سان ناانصافي ٿيندي. منهنجي راءِ موجب جيڪڏهن هن گرلز ڪاليج جو نالو شهيد راڻي محترمه بينظير ڀٽو جي نالي سان منسوب ڪيو وڃي ۽ هن ڪاليج جي بلڊنگ اندر ٻهراڙي جي نياڻين لاءِ هاسٽل پڻ تعمير ڪئي وڃي ته جيئن سڄي سنڌ جون نياڻيون جديد علوم جو فيض حاصل ڪري سگهن. قاسم آباد ۾ رهندڙ قومي اسيمبلي، سينيٽ توڙي صوبائي اسيمبليءَ جي پنجاهه کان وڌيڪ چونڊيل عوامي نمائندن جو اهو اخلاقي ۽ قومي فرض بڻجي ٿو ته هن تعليمي اداري کي فنڪشنل بنائڻ ۾ پنهنجو ڪردار ادا ڪن، جڏهن ته هن اداري جي کولڻ لاءِ فزيبلٽي رپورٽ سنڌ جي تعليم کاتي وٽ اڳ ۾ ئي موجود آهي. |
| The Kawish Group of Publication B/2 Civil Line Hyderabad,Sindh Pakistan. Phone:+92 (22) 2780026,2780027,2780525 Fax: +92 (22) 2780772, 2781167 Email: kawish12@yahoo.com ---- thekawish_hyd@yahoo.com |
ايوان ۾ ”تکيون“ تقريرون ڪيئن شروع ٿيون؟ دودو چانڊيو
 سنڌ اسيمبليءَ جو اجلاس گهڻي عرصي کان وٺي مقرر وقت تي شروع ناهي ٿيو. وقت تي اگر پهچندا آهن ته اسيمبليءَ جا ملازم، صحافي ۽ پوليس وارا، باقي ميمبر صاحبان پنهنجي مرضي سان ايندا آهن ۽ ان حوالي سان ڪافي ڀيرا اسپيڪر نصيحتون به ڪندو رهندو آهي، پر عمل ناهي ٿيندو. اڱاري ڏينهن وارو اجلاس به پوڻا ٽي ڪلاڪ دير سان شروع ٿيو، پر جيترا ڪلاڪ هليو، پي پي جي حوالي سان انتهائي گرم رهيو. اجلاس شروع ٿيندي ئي آغا سراج دراني پهريون ڀيرو ايوان ۾ ڪراچي شهري سرڪار تي تنقيد ڪئي. ناظم ڪراچي جي ڪردار تي تفصيلي ڳالهايو ۽ چيو ته مفاهمت جي پاليسي تحت خاموش آهيون. ڪراچي شهري حڪومت پنهنجون حدون نه اورانگهي، پنهنجي حدن ۾ رهي. آغا سراج جي اهڙي موقف بعد ٻنهي جماعتن جي وچ ۾ دٻيل ڪاوڙ تان ڍڪ لاٿو. ان کي تيزي وري ڊاڪٽر ذوالفقار مرزا جي تقرير ڏني. جنهن مسلم ليگ ق جي ايم پي اي شهريار مهر جي بدامني واري بيان تي ڪاوڙجي اسپيڪر کان ڳالهائڻ جو وقت گهريو. ڊاڪٽر ذوالفقار مرزا شروعات ته شڪارپور ۾ پيدا بدامني کان ڪئي، پر هو ڳالهائيندو ڪراچي ۾ موجوده ٽارگيٽ ڪلنگ تي پهتو ته ڳالهيون تلخين تائين پهتيون. اڻ سڌي ريت ڊاڪٽر ذوالفقار مرزا سنڌ ۾ جاري بدامني کي سڌي ريت سياسي پٺڀرائي قرار ڏنو. ڊاڪٽر ذوالفقار مرزا چيو ته، ڪراچي ۾ رستي جي ڀر ۾ ويٺل معصوم ٻار ته قتل ٿي وڃي ٿو پر هڪ به ايم پي اي يا ايم اين اي قتل نٿو ٿئي. ذوالفقار مرزا سمورن ايم پي ايز جا چٺا ايوان ۾ پيش ڪرڻ جو اعلان ڪندي اها به اپيل ڪئي ته سمورن ايم پي ايز کان پاڪ ڪتاب تي واعدو ورتو وڃي ته هو ڏوهارين جي پٺڀرائي نه ڪندا. ڊاڪٽر ذوالفقار مرزا به آغا سراج دراني وانگي مفاهمت واري پاليسي کان بيزاري جو اظهار ڪندي چيو ته ”ڪاش اسان کي مفاهمت واري پاليسي بنا ڪم ڪرڻ جو موقعو ملي ها ته هر چوڪ تي سياسي بدمعاشن کي لٽڪايان ها. ڊاڪٽر ذوالفقار مرزا پنهنجي اها تقرير ڪري ته هليو ويو، پر جڏهن پوائنٽ آف آرڊر تي ميمبر ڳالهائي رهيا هئا ته ايم ڪيو ايم سان تعلق رکندڙ صوبائي وزير ڊاڪٽر صغير احمد سنڌ اسيمبلي اندر پنهنجو پاليسي بيان ڏيڻ چاهيو. ڊاڪٽر صغير احمد نالو کڻڻ بنا ڊاڪٽر ذوالفقار مرزا ۽ آغا سراج دراني جي تقريرن کي سلطان راهي ۽ مصطفيٰ قريشي وارا ايڪشن قرار ڏنو. جنهن تي ڊپٽي اسپيڪر شهلا رضا کيس روڪيندي چيو ته گهرو وزير ذوالفقار مرزا ايوان ۾ موجود ناهي، ان ڪري اسيمبلي قانون مطابق ڪنهن به وزير جي غير موجودگي ۾ ان جي تقرير تي راءِ نٿي ڏئي سگهجي. شهلا رضا جڏهن ڊاڪٽر صغير احمد جي مائيڪ بند ڪرڻ جون هدايتون ڏنيون ته ايم ڪيو ايم جا سمورا ميمبر اٿي بيهي رهيا ۽ انهن ڊپٽي اسپيڪر شهلا رضا تي جانبداري جو الزام هنيو، جنهن بعد ايم ڪيو ايم جا ميمبر سيد سردار احمد ۽ ڊاڪٽر صغير احمد جي سربراهي ۾ پهريون ڀيرو ايوان جو واڪ آئوٽ ڪري ”وڏيره شاهي مرده باد“ جا نعرا هنيا. سنڌ اسيمبلي ۾ ٻن سالن دوران هي پهريون موقعو هو، جو ايم ڪيو ايم بائيڪاٽ ڪيو. ان کان اڳ ايم ڪيو ايم ارباب غلام رحيم کي جوتو لڳڻ دوران بائيڪاٽ ڪيو هو. تنهن ڪري هن ڀيري ٻنهي جماعتن جي اندر هڪ ٻئي سان جيڪا ”محبت“ آهي، اها وائکي ٿي وئي آهي. اجلاس ۾ ايم ڪيو ايم جي وچ ۾ هن وڏي تلخي کانسواءِ اهم بحث ايم پي اي شهريار مهر جي بيان تي به ٿيو. شهريار مهر جو چوڻ هو ته شڪارپور ضلعي سان 4 صوبائي وزير، 2 صلاحڪار تعلق رکن ٿا، پوءِ به ضلعي ۾ بدامني آهي. چورن هڙتال ڪرائي هڪ ٿاڻي جو ايس ايڇ او رکرايو. شهريار مهر جي ان موقف تي سخت گوڙ ٿيو، جنهن تي ذوالفقار مرزا مٿيون بيان ڏنو. اسيمبليءَ جي اڄوڪي اجلاس ۾ فنڪشنل مسلم ليگ (ق) جي ايم پي اي نصرت سحر عباسي ٽنڊو باگو سول اسپتال جي حالت تفصيل سان بيان ڪئي، جنهن تي ڊاڪٽر ذوالفقار مرزا اتفاق ڪندي چيو ته، ٽنڊي باگي اسپتال جي ايم ايس کي آئون چيف منسٽر سان ملي بدلي ڪرايان ٿو، واقعي ٽنڊو باگي تعلقي اسپتال جي حالت انتهائي خراب آهي. سنڌ اسيمبليءَ جي هن اجلاس ۾ جڏهن آغا سراج دراني مڪاني ادارن بابت اسيمبلي ميمبرن جي سوالن جا جواب ڏيئي رهيو هو ته نصرت سحر عباسي، حاجي منور عباسي، هير سوهو ۽ نديم ڀٽو ڪراچي ماسٽر پلان، حيدرآباد شهري حڪومت ۽ ڪراچي جي فريئر هال بابت سوال ڪيا. نصرت سحر عباسي کي سنڌ اسيمبليءَ جي اجلاسن ۾ پير مظهرالحق ”امان“ چئي پڪاريندو آهي. اڄ ان جو فائدو آغا سراج دراني ورتو ۽ هر جواب ۾ هلڪي مزاح به شامل ڪئي. آغا سراج دراني پير مظهرالحق کي مخاطب ٿي چيو ته، آئون نصرت سحر عباسي کي امان چوان يا ادي؟ پير مظهرالحق ناظمن واري نظام کي راڄ واڙي سڏيو ۽ دادو جو ذڪر ڪندي ٻڌايو ته ”اتي هڪ شهزادو ناظم هو، جنهن ڪي به ڪم نه ڪرايا.“ جنهن تي آغا سراج دراني چيو ته مون وٽ سمورن ناظمن جا حق آهن، اسيمبلي ۾ 2 چار ڪلاڪ وقت ڏيو ته تفصيل سان ٻڌايان، جنهن تي مخالف ڌر جي اڳواڻ ڄام مدد علي چيو ته ”اگر ڪنهن ناظم خلاف ڪرپشن جا تفصيل آهن ته ان خلاف قدم کڻو، هي اجلاس جي ڪارروائي اڳتي هلڻ ڏيو. سنڌ اسيمبليءَ جي اجلاس ۾ ڪجهه ذڪر قاسم آباد حيدرآباد ۾ جاري بدامني جو به ٿيو. مسلم ليگ جي ايم پي اي نزهت پٺاڻ ايوان جو ڌيان ڇڪايو ته قاسم آباد ۾ بدامني عروج تي آهي، ڀتا خوري عروج تي آهي، قاسم آباد جا رهواسي عذاب ڀوڳي رهيا آهن. جنهن تي گهرو وزير ذوالفقار مرزا چيو ته هو خميس ڏينهن قاسم آباد ۾ کلي ڪچهري ڪري بدامني ڪندڙن خلاف ڪارروائي ڪندو. اجلاس ۾ نواب تيمور ٽالپر پنجاب اسيمبليءَ ۾ چشما-جهلم لنڪ ڪئنال تي بجلي گهر اڏڻ جي حمايت ۾ پاس ڪيل ٺهراءَ طرف ڌيان ڇڪايو ۽ چيو ته سنڌ ۾ اڳ ئي پاڻيءَ جي کوٽ آهي، اسان جي وڏي ڀاءُ کي ائين نه ڪرڻ گهرجي. سخت اختلافن ۽ ايم ڪيو ايم جي بائيڪاٽ باوجود هڪ ٺهراءُ پاس ڪيو ته اويڪيو ٽرسٽ جا انتظامي اختيار وفاق کان صوبن حوالي ڪيا وڃن. هيءُ ٺهراءُ به ايوان متفق راءِ سان پاس ڪيو. اجلاس ۾ آخر تائين ايم ڪيو ايم جا ميمبر شريڪ نه ٿيا، جنهن تي اجلاس ختم ٿيڻ بعد مخالف ڌر جي اڪثر ميمبرن شهريار مهر ڏي اشارو ڪندي چوندا رهيا ته شڪارپوري پنهنجو ڪم ڏيکاريو، ڇاڪاڻ ته پ پ ۽ ايم ڪيو ايم جي وچ ۾ هي اختلاف شهريار مهر جي بدامني واري سخت موقف کانپوءِ ٿيا، جن هڻي وڃي هنڌ ڪيو. dodochandio@yahoo.com |
| The Kawish Group of Publication B/2 Civil Line Hyderabad,Sindh Pakistan. Phone:+92 (22) 2780026,2780027,2780525 Fax: +92 (22) 2780772, 2781167 Email: kawish12@yahoo.com ---- thekawish_hyd@yahoo.com |
پيپلزپارٽي ۽ ايم ڪيو ايم درميان مفاهمت جو مستقبل ڪهڙو هوندو؟ اختيار کوکر
سنڌ اسيمبلي جي ايوان ۾ اڱاري ڏينهن گهرو معاملن واري صوبائي وزير ڊاڪٽر ذوالفقار مرزا ۽ مڪاني ادارن واري وزير آغا سراج دراني پاران ڪراچي جي صورتحال تي سخت بيان ڏيڻ کانپوءِ صوبائي حڪومت ۾ شامل ٻن اتحادي ڌرين پيپلز پارٽي ۽ ايم ڪيو ايم جي مقامي قيادت وچ ۾ ناتا هڪ ڀيرو ٻيهر ڇڪتاڻ وارا ٿي ويا. ايم ڪيو ايم مطالبو ڪري ڇڏيو ته پيپلز پارٽي جي قيادت ڊاڪٽر ذوالفقار مرزا ۽ آغا سراج دراني جي بيانن تي معافي وٺي. پيپلز پارٽي ۽ ايم ڪيو ايم جي اتحاد جو مستقبل ڇا ٿيندو؟ انهي سوال جي جواب ۾ وڃڻ کان پهرين اهو ڏسڻ جي ضرورت آهي ته ڇڪتاڻ واري تازي صورتحال ڪيئن پيدا ٿي؟ سنڌ اسيمبلي جو اڱاري ڏينهن وارو اجلاس ٿيڻ کان هڪ ڏينهن اڳ بلاول هائوس ۾ صدر آصف علي زرداري جي صدارت هيٺ پيپلز پارٽي ۽ ايم ڪيو ايم ڪور ڪاميٽي جي گڏجاڻي ٿي. انهي گڏجاڻي ۾ اهو طئه ٿيو ته صوبي ۾ مڪاني ادارن جون چونڊون ڪرائڻ کان پهرين ناظمن جي جاءِ تي سرڪاري آفيسرن کي ايڊمنسٽريٽر مقرر ڪيو ويندو. ايڊمنسٽريٽر مقرر ٿيڻ سان گڏ مڪاني ادارن جي نين چونڊن جي تاريخ جو پڻ اعلان ڪيو ويندو. انهيءَ کانپوءِ سومر واري رات ٻي وڳي تائين سي ايم هائوس ۾ حڪومت ۾ شامل اتحادي ڌرين جي گڏجاڻي ٿي. انهي گڏجاڻي ۾ عوامي نيشنل پارٽي ۽ فنڪشنل مسلم ليگ کي پڻ شامل ڪيو ويو. گڏجاڻي ۾ طئه ٿيو ته شهر اندر امن امان قائم ڪرڻ ۽ ٽارگيٽ ڪلنگ جي هلندڙ سلسلي کي روڪڻ لاءِ اتحادي ڌرين جا اڳواڻ گڏجي ڇڪتاڻ وارن علائقن جو دورو ڪندا ۽ گڏجي حالتن کي ڪنٽرول هيٺ آندو ويندو. ساڳي وقت اهو پڻ طئه ٿيو هو ته ايڊمنسٽريٽر مڪاني ادارن جي چونڊن جي اعلان کانپوءِ مقرر ڪيا ويندا. پر مڪاني ادارن جون چونڊون ڪهڙي نظام هيٺ ٿينديون؟ ايس ايل جي او 2001ع وارو موجوده نظام قائم رهندو يا ڪو نئون نظام ايندو؟ اهو فيصلو بعد ۾ ڪيو ويندو. رات دير تائين ٿيل انهي گڏجاڻيءَ مان لڳي پيو ته حڪومت جي اتحادي ڌرين ۾ مڪاني ادارن ۽ امن امان وارن معاملن تي گذريل هڪ مهيني کان هلندڙ ڇڪتاڻ گهٽ ٿي ويندي. پر ٻئي ڏينهن صبح جو سنڌ اسيمبلي جي ٿيل اجلاس ۾ پهرين مڪاني ادارن واري صوبائي وزير آغا سراج دراني پوائنٽ آف آرڊر تي ڳالهائيندي اخبار ۾ شايع ٿيل ڪراچي شهري حڪومت جي ناظم جو بيان ايوان کي ڏيکاريندي چيو ته ناظم چيو آهي ته ڪراچي بلڊنگ ڪنٽرول اٿارٽي پاران گذريل ڇهن مهينن دوران عمارتن جي تعمير جا منظور ڪيل سمورا نقشا غير قانوني آهن، ڇاڪاڻ جو انهن نقشن جي فيس شهري حڪومت کي ادا ناهي ڪئي وئي. آغا سراج دراني چيو ته شهري حڪومت کي اهڙو ڪوبه اختيار ڪونهي ته صوبائي اداري جي منظور ڪيل نقشن کي رد ڪري. هن چيو ته شهري حڪومت جو ڪراچي اسٽريٽيجڪ پلان 2020ع پڻ صوبائي حڪومت جي معاملن ۾ هڪ وڏي مداخلت آهي، جنهن جو قانون واري صوبائي کاتي کي ان پلان جو جائزو وٺڻ گهرجي. هن اهو پڻ چيو ته جڏهن ته ڊي ايڇ اي ۽ ڪنٽونمينٽ بورڊ وارا به پنهنجا اهڙا ترقياتي پلان صوبائي حڪومت کان منظور ڪرائڻ جا پابند آهن ۽ منظور ڪرائن ٿا ته پوءِ شهري حڪومت ان قانون تي عمل ڇو نٿي ڪري. هن چيو ته اسان صدر آصف علي زرداري جي مفاهمت واري پاليسي ڪري گهڻو برداشت ڪيو آهي، وڌيڪ برداشت نٿا ڪري سگهون. هن اهو پڻ چيو ته شهري حڪومت جو ناظم ٽي وي چينلن تي اچي ٻين کي گهٽ وڌ ٿو ڳالهائي، هن جو نفسياتي علاج ڪرايو وڃي.
آغا سراج دراني جي ان بيان تي ايم ڪيو ايم جي ميمبر فيصل سبزواري ڳالهائڻ گهريو، پر قانون واري وزير اياز سومري سندس سيٽ تي وڃي کيس ٿڌو ڪيو. ان کانپوءِ شڪارپور مان چونڊيل مسلم ليگ (ق) جي ميمبر شهريار مهر پاران شڪارپور ۾ امن امان جي خراب صورتحال جي ڪيل ذڪر جو جواب ڏيندي گهرو کاتي واري وزير ڊاڪٽر ذوالفقار مرزا شڪارپور جي امن امان جي خرابي جو ذميوار علائقي جي وڏيرن کي قرار ڏيندي ڪراچي جي امن امان جي صورتحال تي پڻ ڳالهايو. انتهائي جذباتي انداز ۾ تقرير ڪندي هن صاف صاف چيو ته ڪجهه ڌريون شهر اندر پنهنجي ناپاڪ سياسي مقصدن لاءِ راهه ويندڙ غريب ماڻهن جو خون وهائي رهيون آهن. هن چيو ته ڪراچي ۾ پڻ سرحدي علائقن جهڙي امن امان جي صورتحال پيدا ٿي وئي آهي. ماڻهن کي خدا جو خوف نٿو ٿئي جو اسيمبلي جي هڪ وڌيڪ سيٽ حاصل ڪرڻ لاءِ بي گناهه ماڻهو ٿا مارين. هن چيو ته صدر جي مفاهمتي پاليسي سبب اسانجا هٿ ٻڌل آهن، جيڪڏهن مونکي ڪارروائي ڪرڻ لاءِ آزاد ڇڏيو وڃي ته ٽن مهينن اندر ڏوهارين جو خاتمو آڻي ڇڏيندس. هن چيو ته مون صدر ۽ وزير اعظم کي به سڌو ٻڌايو آهي ته شهر اندر رتو ڇاڻ ڪير پيو ڪرائي. هن چيو ته اسان سڀ انهي رتوڇاڻ جا ذميوار آهيون. هن چيو ته ڪراچي جو ايم پي اي يا ايم اين اي ڇو نٿو قتل ٿئي، صرف غريب ڇو ٿا ماريا وڃن. هن چيو ته مان فوج کي درخواست ڪندس ته هو اچي شهر جو ڪنٽرول سنڀالين. ڊڄو ان ڏينهن کان جڏهن اسان مٿان ڪو ڏنڊي وارو اچي ويهي رهندو. هن چيو ته جڏهن به اسان ڪا ڪارروائي ٿا ڪيون ته ڏوهارين کي چونڊيل نمائندا ٿا ڇڏائي وڃن.
هن جي انهي تقرير جو ان وقت ڪنهن به جواب نه ڏنو، پر ڪجهه ڪلاڪن کانپوءِ ايم ڪيو ايم سان تعلق رکندڙ صحت واري صوبائي وزير ڊاڪٽر صغير احمد جيڪو ڊاڪٽر ذوالفقار مرزا جي تقرير وقت ايوان ۾ نه هيو، اهو آيو ۽ پوائنٽ آف آرڊر تي ڳالهائيندي چيو ته اسان دل تي پٿر رکي پيپلز پارٽي سان مفاهمت واري پاليسي تي عمل ڪري رهيا آهيون. اسان جا هڪ سال ۾ 125 ڪارڪن قتل ٿي ويا آهن. هن ايوان ۾ ماڻهو اچي سلطان راهي ۽ مصطفيٰ قريشي واري اسٽائل ۾ تقريرون ٿا ڪن. انهن تقريرن سان ڪم نه هلندو. انهي تي اجلاس جي صدارت ڪندڙ ڊپٽي اسپيڪر شهلا رضا کيس چيو ته اوهين گهرو کاتي واري وزير جي بيان تي ڳالهائي رهيا آهيو، هو ايوان ۾ موجود ناهي، ان ڪري قاعدن موجب اوهان ان جي غير موجودگي ۾ نٿا ڳالهائي سگهو. جنهن کانپوءِ ايم ڪيو ايم وارا ”دهشتگردي نهين چلي گي“ جا نعرا هڻي ايوان مان بائيڪاٽ ڪري ويا.
سنڌ اسيمبلي ۾ پيپلز پارٽي جي پارليامينٽري اڳواڻ پير مظهر الحق ايم ڪيو ايم وارن جو پاسو وٺندي ڊپٽي اسپيڪر کي چيو ته اوهان کي ايم ڪيو ايم جي وزير کي ڳالهائڻ ڏيڻ گهرجي. اسان مفاهمت واري سياست ڪري رهيا آهيون. هن ڊپٽي اسپيڪر کي چيو ته اوهين گهڻو جذباتي ٿي ويون هيون. هن درخواست ڪئي ته ڏهن منٽن لاءِ اجلاس ملتوي ڪيو ته اسان بائيڪاٽ ڪري ويل دوستن کي راضي ڪري واپس وٺي اچون. پيپلزپارٽي جا ٽي وزير ڏيڍ ڪلاڪ تائين ايم ڪيو ايم وارن سان ڳالهيون ڪندا رهيا، پر هو ايوان ۾ واپس ڪونه آيا، جنهن کانپوءِ نائين زيرو تي پريس ڪانفرنس کي خطاب ڪندي ايم ڪيو ايم جي اڳواڻن ڪراچي شهر اندر رتوڇاڻ جو ذميوار گهرو معاملن واري وزير کي قرار ڏنو ۽ چيو ته پيپلزپارٽيءَ وارا ڪراچيءَ تي قبضو ڪرڻ جي سازش ڪري رهيا آهن، ان ڪري آغا سراج درانيءَ چيو هو ته ڪراچيءَ جو ايندڙ ناظم پيپلزپارٽيءَ جو هوندو. هنن چيو ته ڊاڪٽر ذوالفقار مرزا ۽ آغا سراج دراني ڊرامو ڪري رهيا آهن. اهو پڻ چيو ته جيڪڏهن پيپلزپارٽي وارن کي وڌيڪ موقعو ڏنو ويو ته ملڪ کي ٽوڙڻ جي سازش ڪامياب ٿي ويندي. هنن چيو ته پيپلزپارٽيءَ جي ڪجهه اڳواڻن جي ڪوشش آهي ته پيپلزپارٽي ۽ ايم ڪيو ايم جو اتحاد ٽٽي وڃي. پر ايم ڪيو ايم جي رابطا ڪاميٽي ان معاملي تي اڃا غور ڪري رهي آهي. انهيءَ سياسي سرگرميءَ کانپوءِ صوبائي حڪومت ۾ شامل ٻنهي اتحادي ڌرين وچ ۾ ڇڪتاڻ واري گرمي پد ۾ واڌ اچي وئي آهي. سنڌ حڪومت رينجرز کي ڪراچيءَ جي امن مان جي خرابي وارن 25 ٿاڻن جي حدن ۾ دهشتگردن خلاف ڪارروائي ڪرڻ جي اجازت ڏئي ڇڏي آهي.
سنڌ اسيمبليءَ جي ايوان ۾ صدر آصف علي زرداريءَ جي ٻن دوست وزيرن جو اڱاري ڏينهن واريون اهي تقريرون پارٽيءَ جي مقامي قيادت ڪيترو پسند ڪيون، انهيءَ جوا ندازو ان مان به لڳائي سگهجي ٿو ته ذوالفقار مرزا جي تقرير دوران پيپلزپارٽيءَ جا ميمبر مسلسل ڊيسڪون وڄائي کيس داد ڏيندا رهيا. ان سان گڏ اهو پڻ ظاهر ٿي پيو ته صوبائي حڪومت جي اڪثريتي پارٽيءَ جا وزير مفاهمت واري موجوده پاليسيءَ کي ڪيئن ٿا ڏسن ۽ هو پاڻ کي ڪيترو مجبور محسوس ڪري رهيا آهن. اهي ڳالهيون پنهنجي جاءِ تي ته سنڌ جي گهرو کاتي واري وزير پاران سنڌ اسيمبليءَ جي ايوان تي اهو بيان ڏيڻ ته هو ڪراچي جي صورتحال کي ڪنٽرول ڪرڻ لاءِ فوج کي دعوت ڏئي ٿو. هڪ چونڊيل حڪومت جي چونڊيل وزير پاران هڪ چونڊيل ايوان جي فلور تي اها ڳالهه ڪرڻ ڇا انهيءَ جي نشاندهي نٿي ڪري ته ڪراچي شهر جي امن امان جي صورتحال سنڌ حڪومت ۽ سنڌ پوليس جي هٿن مان ٻاهر نڪري رهي آهي؟ جيڪڏهن صورتحال هنن جي هٿن مان ٻاهر نڪري رهي آهي ته اها ڪنهن جي ناڪامي آهي؟ انهيءَ سان گڏ اها ڳالهه ڪرڻ ته ڊڄو ان ڏينهن کان ته ڪو ڏنڊو وارو اسان سڀني مٿان اچي نه ويهي رهي، جڏهن هڪ طرف اسان ڏنڊي واري کي پاڻ دعوت ڏئي رهيا آهيون ته ڏنڊي واري جي اچڻ کان ٻين کي ڊيڄارڻ جو ڇا مقصد ٿئي ٿو. گهرو کاتي واري وزير جو اهو چوڻ ته توهان جي لاءِ آخري موقعو آهي، ڇا گهرو کاتي جو وزير انهيءَ آخري موقعي ڏيڻ کانپوءِ انهن ڏوهارين خلاف ڪارروائي ڪري سگهندو، جن کي هو سڃاڻي ٿو؟ هڪ اهم ڳالهه اها به ٿي ته ايم ڪيو ايم جي اڳواڻن پنهنجي پريس ڪانفرنس ۾ چيو آهي ته گهرو معاملن واري وفاقي وزير رحمان ملڪ کين جواب ڏئي ڇڏيو آهي ته هو سندن نشاندهيءَ تي ڏوهارين خلاف رينجرز ذريعي ڪراچيءَ ۾ ڪارروائي نٿو ڪرائي سگهي، ڇاڪاڻ جو اهو صوبائي معاملو آهي. جنهن مان لڳي ٿو ته ڪجهه ڏينهن اڳ رينجرز پاران صوبائي حڪومت جي اجازت کانسواءِ لياريءَ ۾ ڪيل ڪارروائيءَ جي ٿيل عوامي احتجاج جو اثر ٿيو آهي. پر هاڻي جڏهن سنڌ حڪومت رينجرز کي ڪراچيءَ ۾ ڪارروائي ڪرڻ جي اجازت ڏئي ڇڏي آهي ته اهو وفاقي فورس سنڌ حڪومت جي مرضيءَ سان ڪارروائي ڪندي يا وفاقي ادارا انهيءَ تي اثر انداز ٿيندا؟ جيڪڏهن اها ڪارروائي لياري وانگر يڪطرفي ٿي ته حڪومت جي ٻي اتحادي ڌر اي اين پي ناراض ٿي سگهي ٿي، پر جيڪڏهن گهرو کاتي واري صوبائي وزير واري ڏنل بيان موجب ٿي ته هن جي بيان تي ناراضگيءَ جو مظاهرو ڪندڙ وڌيڪ ناراض ٿي سگهن ٿا. سو انهيءَ صورتحال مان نٿو لڳي ته ڪراچي شهر اندر دهشتگردن خلاف في الحال ڪا موثر ڪارروائي ٿيڻ جا امڪان آهن. هاڻي اچون ٿا ان طرف ته پيپلزپارٽي ۽ ايم ڪيو ايم جي مقامي قيادت وچ ۾ پيدا ٿيل تازي ڇڪتاڻ جو انت ڇا ٿي سگهي ٿو. پهرين ڳالهه اها آهي ته ٻنهي ڌرين وچ ۾ سخت بيان بازيءَ جو اهو سلسلو پهريون ڀيرو ڪونه ٿيو آهي. انهيءَ کان پهرين اين آر او جي معاملي تي ايم ڪيو ايم پاران اين آر جي مخالفت کانپوءِ ڊاڪٽر ذوالفقار مرزا چيف جسٽس آف پاڪستان کي اپيل ڪئي هئي ته سنڌ ۾ قتل ۽ دهشتگرديءَ جا اٽڪل چار هزار ڪيس معاف ڪرائيندڙن جو نوٽيس وٺي ڪارروائي ڪري. انهيءَ کانپوءِ جنوريءَ جي پهرين هفتي ۾ ڪراچي اندر ٿيل رتوڇاڻ جي موقعي تي ايم ڪيو ايم حڪومت ڇڏڻ جو اعلان ڪندي فوج کي شهر جو ڪنٽرول سنڀالڻ جي دعوت ڏني هئي، پر ٻنهي پارٽين جي اعليٰ قيادت پاڻ ۾ ڳالهايو ۽ مفاهمت وارو قافلو روان دوان رهيو. هن ڀيري به اهو ئي ٿيو جو نائن زيرو تان جاري ٿي ويو ته وزير اعظم يوسف رضا گيلاني ۽ سنڌ جي وڏي وزير سيد قائم علي شاهه ايم ڪيو ايم جي قائد سان فون تي ڳالهايو ۽ کيس ٻڌايو ته وزير اعظم صدر سان هنگامي ملاقات ڪري کيس صورتحال کان آگاهه ڪيو، جنهن کانپوءِ صدر سنڌ جي گهرو کاتي ۽ مڪاني ادارن جي وزيرن سان ڳالهايو ۽ مٿن سخت ناراض ٿيو ته هڪ طرف هو مفاهمت جي پاليسيءَ تي عمل ڪندي سڀني کي گڏ کڻي هلڻ جي ڪوشش ڪري رهيا آهن ته ٻئي طرف اوهان ٺهيل ڪم ڊاهي رهيا آهيو. ٻڌايو وڃي ٿو ته هن کين وڌيڪ بيان بازي ڪرڻ کان پڻ روڪي ڇڏيو.
بيان موجب وزير اعظم متحده جي قائد سان سنڌ اسيمبليءَ ۾ اڱاري ڏينهن واري پيدا ٿيل صورتحال تي افسوس جو اظهار ڪيو. جنهن کانپوءِ ايم ڪيو ايم پيپلزپارٽي سان مفاهمت وارو عمل جاري رکڻ جوا علان ڪري ڇڏيو آهي. ٿي سگهي ٿو ته سنڌ حڪومت جي ٻن وزيرن اسيمبلي ايوان ۾ بيان پارٽي پاليسيءَ جي خلاف ڏنا هجن يا اتحادين کي ڊيڄارڻ جي ڪوشش ڪئي هجي پر سوال اهو ٿو پيدا ٿئي ته هنن جيڪي ڳالهيون ڪيون، ڇا اهي غلط آهن. جيڪڏهن هنن جذباتي انداز ۾ يا سياسي اڻڄاڻائي ۾ ئي سهي اصل حقيقتن تان پردو کنيو آهي ۽ پنهنجي پارٽي ڪارڪنن ۽ ووٽرن جي دل جي ڳالهه ڪئي آهي ته انهيءَ کي وزن نه ڏئي پارٽي قيادت اتحادين کي راضي رکندي پنهنجي پارٽي ڪارڪنن ۽ ڪروڙين ووٽرن جي ناراضگيءَ جو خطرو سر تي کڻي درست فيصلو ڪندي؟
The Kawish Group of Publication
B/2 Civil Line Hyderabad,Sindh Pakistan.
Phone:+92 (22) 2780026,2780027,2780525 Fax: +92 (22) 2780772, 2781167
Email: kawish12@yahoo.com ---- thekawish_hyd@yahoo.com
B/2 Civil Line Hyderabad,Sindh Pakistan.
Phone:+92 (22) 2780026,2780027,2780525 Fax: +92 (22) 2780772, 2781167
Email: kawish12@yahoo.com ---- thekawish_hyd@yahoo.com
Subscribe to:
Posts (Atom)